R/wasaare N/Cadde iyo wafdi uu hogaaminayo oo saakay Muqdisho kasoo dagay

Waxaa saakay garoonka diyaaradaha ee magaalada Muqdisho kasoo dagay wafdi uu hogaaminayo ra,iisal wasaaraha Soomaaliya Nuur Xasan Xuseen (Nuur Cade), wafdigaasoo diyaaradii siday ay si nabadgalyo leh usoo cagadhigatay dabadeedna uga duushay garoonka iyadoo aan wax hoobiyayaal ah lagu tuurin .

Wafdiga ra`iisal wasaaraha ayaa waxaa uu ahaa mid horay loo shaaciyey, waxaana garoonka diyaaradaha ee Aadan Cadde ku soo dhaweeyeen masuulyiin ka tirsan xukumadiisa iyo weliba ilaalada Gaarka ah ee ra'isul wasaaraha.

Ra'isul wasaare Nuur Cadde oo hoogaaminayey wafdigii dowlada Somaliya uga qeyb galay wadahadaladii Mucaaradkaee Jabuuti ayaa waxaa Imaanshihiisa Muqdishu ku soo aadaysaa xili koox diimeedka Al-Shabaab 13/09/2008 soo saareen hanjabaad ah in aysan haba yaraatee wax diyaarad ah ka soo degi karin garoonka kana duuli Karin.

Arintan ayaa waxa ay meesha gabi ahaanba ka saareysaa hanjabaadii aheyd in aysan garoonka Muqdishu ka soo degi karin wax diyaarado ah, iyadoo ey sidoo kalena diyaarado kale ey kasoo dageen garoonkaasi ka hor safarkan wafdiga ra`iisal wasaaraha balse kuwaasi hoobiyayaal lagu tuuray iyo kuwo loogu soo jawaabayba ey galaafteen nolosha dad badan oo rayid ah.

Afhayeenka ciidamada Amisom ayaa waxaa uu shabakada Calanka u xaqiijiyaya in wafdiga raiisal wasaarahu si nabadgalyo kusoo gaareen garoonka diyaaradaha Muqdisho iyadoo aan wax duqeyn ah loo geesan sidii laba jeer oo horeyba dhacday.

Bayaankii ey ku xireen garoonka Muqdisho kooxda Al-Shabaab ayaa waxa ey ku sheegeen in garoonkaasi ey isticmaalaan waxa ey ugu yeereen cadowga sidaas darteedna ey hanjabaadda usoo saareen balse arintan ayaa saameysay oo kaliya diyaaradaha rakaabka ee dadka rayidka ah raacaan maadaama kuwii "cadowgu" ey habeen iyo maalinba ey si caadi ah u isticmaalaan garoonka.

Go`aankan "lagu xiray" garoonka Aadan Cadde ayaa waxaa Cambaareyn kala duwan u jeediyey ururo kala duwan oo ey u horeeyaan Ururka Mucaaradka ee la baxay Dib u Xoreynta Dalka..

Ilaa iyo iminka si rasmi ah looma shaacin in uu garoonka xiranyahay ama uu furanyahay, waxaana maanta magaalada Muqdisha ay tahay mid degen walow uu soconaayo qax xoogan oo looga barakacayo xaafadaha ka agdhow suuqa Bakaaraha.